عل الماشى

إلى مرضى الضغط ولجميع الأعمار ..... الأن العلاج السحرى لتظبيط الضغط سواء العالى او المنخفض .....فقط شاهد على قناة المحور البرنامج المعجزة ( 48 ساعة ) تقديم الحج سيد ابوحفيظة اكبر تاجر حرنكش فى الصعيد الجوانى والاخت هناء سمرى .
تنبيه هام / لايجب ان تزيد جرعة المشاهد عن عشرة دقائق فقط والا ستنفجر جميع غددك الصماء واللى بتتكلم تباعا
***************************************************************************
وزير التربية والتعليم اتص فى نواضره - عقبال الاعادى يارب - ولم يتصل تليفونيا بأول الثانوية العامة من المكفوفين ، شأنه شأن غيره من الطلاب ، ويقال ان سيادته كان فاكر ان الكفيف مابيسمعش كمان ، اقول ايه غير ان سيادته اعمى البصر والبصيرة فى وقت واحد
**************************************************************************
كلما سمعت صوت من الاصوات اللبنانية قلت ، لو كانت سايكس بيكو رجلا لقتلته ، نجاح لبنان للاسف يتمثل فى مجموعة من المطربات والمطربين الامامير اللى نجحوا انهم ينسونا يعنى ايه طرب ، مش احسن لبنان تبقى فى سوريا واهو تبقى خيبتنا فى بعض
**************************************************************************
هو ايه لازمة هيفاء فى فيلم دكان شحاته ،يعنى ماتنفعش اى ممثلة تقوم بالدور ده ، وبعدين معناه ايه انها تطلع فى معظم مشاهدها بصدر نصف عارى رغم ان اخوها صعيدى ، فين الواقعية يا عم خالد يوسف ؟
*************************************************************************
بجد انا احترم جدا الاداء الاعلامى لمنى الشازلى لكنى صدمت حين قدمت ممثل متوسط الموهبة اسمه عمرو سعد وكأنه مارلون براندو العرب ، طلعته سابع سما واكيد هاينزل على جدور رقبته لما يبان على مستواه الحقيقى ، الاخ اقصى مواهبه انه بيسمع الحوار مش بيمثل
**************************************************************************
اشتكى لى احد الآباء من ان ابنه يضع كتب غير دراسية فى قلب كتاب مدرسى مدعيا انه يراجع دروسه ، حيلة كنا نفعلها زمان لاختلاس اى وقت للقراءة ، وحينما طلبت من الاب ان يرينى ما يقرأه ابنه ، جاء الى بقصة من قصص رجل المستحيل ، افتكرت ساعتها كيف ان ابى عاقبنى فى مرة من المرات عقاب شديد لانه وجد فى يدى رواية لتوفيق الحكيم بدل من كتاب الدراسة ...... عرفتوا ليه الناس منبهرة اوى بأحمد العايدى وعلاء الاسوانى ؟ لان بدايات قراءتهم قصص رجل المستحيل احد اسباب تدهور الحس القصص لدى الشباب
**************************************************************************
اول سؤال سألته لنفسى بعد ماخرجت من مشاهدتى لفيلم ابراهيم الابيض : هو مين زعلان من مين ؟ ايه الالغاز دى كلها ؟ يا اخونا تيتانيك ما اخدش اوسكار احسن سيناريو عشان السيناريست ما نجحش فى نقل المشاعر الكفيلة اللى تخلى بطلة الفيلم (روز ) تقدم على الانتحار ، تيتانيك اللى الناس بتعتبره فيلم مفهوش غلطة . ما رأيته فى فيلم ابراهيم الابيض شيىء يبتعد تماما عن فكرة السيناريو
***************************************************************************
بصراحة بصراحة وبكل وقاحة الاخ الفاضل محمد عبد القدوس ،قدراتى العقلية لا تستوعب ما يطرحه من افكار ، وكلما قرأت له شيىء اشعر بتلبك معوي شديد وان الدنيا معدش فيها خير خلاص ، نفسى يكتب جملة مفيدة واحدة يقابل بيها ربنا
**************************************************************************
فوجئت بكم المدونات فى الفترة الاخيرة ، نعم فوجئت مش ان هناك كثير من المدونين لا المفاجأة فى عدد المدونات التى تتبع شخص واحد ، فى ناس ليها اكثر من اربع مدونات ، انا مدونة واحدة وحاسس انى بابنى السد العالى ، هو الناس دول بيجيبو وقت منين؟
***************************************************************************
سألنى : هو مين ده
قلت : ده واحد اسمه تشى جيفارا
سألنى : ايوه يعنى بيبيع ايه ؟
قلت : لا ابدا ده بدأ حياته فى السيدة زينب بيبيع كبده وبعدين هاجر وبقى زى ما انت شايف كده
*******************************************
وحيد جهنم